اسرع واروع كريم كراميل ومن دون فرن

السلام عليكم اخواتي
الكثير منا يحب كريم كراميل وخاصة في شهر رمضان نعملوه بكثرة والمعروف ان كريم كراميل يطيب في الفرن اليوم جبتلكم طريقة جديدة وسريعة نطيبوه على النار مباشرة وفي ربع ساعة يكون جاهز نخليكم مع الوصفة

المقادير:
نصف لتر حليب
3بيضات حجم كبير او 4 حجم صغير
100غ سكر
م ص فاني من النوع الجيد والاحسن نستعمل نتاع الميزان
لتحضير الكراميل
نحتاج الى100غ سكر

الطريقة:

اولا نحضر الكراميل
في كسرونة نحط 100غ سكر ونحطه على نار تكون هادئة بدون مانحركه حتى يذوب ويصبح لونة بني فاتح
نحضر الاواني لي نطيب فيها الكريم الكراميل او ما يسمى les ramquins نحطهم داخل صينية لي نقدر نحطها فوق النار و نحط داخل كل قالب كمية من الكراميل



من جهة نحط الحليب يسخن الى درجة الغليان
بواسطة المضرب اليدوي نحرك البيض والسكر والفاني ونفرغ عليهم الحليب ونحرك
نفرغ الخليط في القوالب



ونغطيهم بورق الالمنيوم





نفرغ ماء ساخن داخل الصينية يعني نطيبهم في حمام مائي والماء لازم يصل الى منتصف القوالب

نغطي الصينية بغطاء و حطها على نار متوسطة لمدة ربع ساعة وللتاكد ان الكريم كراميل طاب ندخل راس سكين اذا خرج ناشف معناها طاب
نخليه يبرد تماما من بعد نحطه في الثلاجة يبرد جيدا وعند التقديم نقلب الكريم كراميل في صحون ونقدمه وهذا شكله النهائي





نتمنى تعجبكم الطريقة وتجربوها ولاتنسوني من صالح دعائكن خاصة اننا في هذا الشهر المبارك
في امان الله

بارك الله فيك